ಯಗಚಿ ಡ್ಯಾಮ್ವು ಕರ್ನಾಟಕ ರಾಜ್ಯದ ಹಾಸನ ಜಿಲ್ಲೆಯ ಬೇಲೂರು ತಾಲ್ಲೂಕಿನ ಚಿಕ್ಕಬೈದಿಗೆರೆ ಗ್ರಾಮದಲ್ಲಿ, ಕಾವೇರಿ ನದಿಯ ಉಪನದಿಯಾದ ಯಗಚಿ ನದಿಗೆ ಅಡ್ಡಲಾಗಿ ನಿರ್ಮಿಸಲಾದ ಆಣೆಕಟ್ಟಾಗಿದೆ. ಈ ಅಣೆಕಟ್ಟನ್ನು 2001ರಲ್ಲಿ ನಿರ್ಮಿಸಲಾಯಿತು. ಜಲಾಶಯವು ಸಮುದ್ರ ಮಟ್ಟದಿಂದ 965 ಅಡಿ ಎತ್ತರದಲ್ಲಿದೆ. ಯಗಚಿ ಅಣೆಕಟ್ಟಿನ ಉದ್ದ 1,280 ಮೀಟರ್ಗಳು ಹಾಗೂ ಜಲಾಶಯದ ಅಡಿಪಾಯದ ಮೇಲಿನ ಗರಿಷ್ಠ ಎತ್ತರ 26.237 ಮೀಟರ್ ಆಗಿದೆ.
ಯಗಚಿ ಅಣೆಕಟ್ಟಿನ ದೂರಗಳು
- ಬೆಂಗಳೂರು – 217 ಕಿ.ಮೀ
- ಹಾಸನ – 38 ಕಿ.ಮೀ
- ಬೇಲೂರು – 3 ಕಿ.ಮೀ
- ಚಿಕ್ಕಮಗಳೂರು ರೈಲ್ವೆ ನಿಲ್ದಾಣ – 21 ಕಿ.ಮೀ
- ಹಾಸನ ರೈಲ್ವೆ ನಿಲ್ದಾಣ – 41 ಕಿ.ಮೀ
ನೀರಾವರಿ ಉದ್ದೇಶಗಳ ಜೊತೆಗೆ ಬೇಲೂರು, ಚಿಕ್ಕಮಗಳೂರು ಹಾಗೂ ಹಾಸನ ಜಿಲ್ಲೆಗಳ ಕುಡಿಯುವ ನೀರಿನ ಅಗತ್ಯವನ್ನು ಪೂರೈಸುವ ಉದ್ದೇಶದಿಂದ ಈ ಅಣೆಕಟ್ಟನ್ನು ನಿರ್ಮಿಸಲಾಗಿದೆ.
ಇದು 5 ಗೇಟ್ಗಳನ್ನು ಹೊಂದಿರುವ ಸಣ್ಣ ಅಣೆಕಟ್ಟಾಗಿದೆ. ಪ್ರವೇಶದ್ವಾರದಿಂದ ಎರಡು ಮಾರ್ಗಗಳಿವೆ. ಅವುಗಳಲ್ಲಿ ಒಂದು ಜಲಾಶಯದ ನೋಟದ ಕಡೆಗೆ ಕರೆದೊಯ್ಯುತ್ತದೆ ಹಾಗೂ ಇನ್ನೊಂದು ಅಣೆಕಟ್ಟಿನ ಕೆಳಭಾಗಕ್ಕೆ ಕರೆದೊಯ್ಯುತ್ತದೆ. ಅಲ್ಲಿ ಗೇಟ್ಗಳ ಮೂಲಕ ಹರಿಯುವ ನೀರಿನ ಮನೋಹರ ದೃಶ್ಯವನ್ನು ವೀಕ್ಷಿಸಬಹುದು. ಇಲ್ಲಿ ಬೋಟಿಂಗ್ ಸೇರಿದಂತೆ ಕೆಲವು ಜಲಕ್ರೀಡೆಗಳ ಸೌಲಭ್ಯವೂ ಲಭ್ಯವಿದೆ.
ಇದು ಉತ್ತಮ ಪಿಕ್ನಿಕ್ ತಾಣವಾಗಿದ್ದು, ಅತ್ಯಂತ ರಮಣೀಯ ದೃಶ್ಯಾವಳಿಯನ್ನು ಹೊಂದಿದೆ. ಅಣೆಕಟ್ಟಿನ ಉದ್ದಕ್ಕೂ ನಿರ್ಮಿಸಲಾಗಿರುವ ಉದ್ಯಾನವನದಲ್ಲಿ ವಿಹರಿಸುತ್ತಾ, ಹರಿಯುವ ನೀರಿನ ಸುಂದರ ನೋಟವನ್ನು ಆನಂದಿಸಬಹುದು.
ಭೇಟಿ ನೀಡಿ