ಕೊಡಿಗೆ ಜಲಪಾತವು ಕರ್ನಾಟಕ ರಾಜ್ಯದ ಚಿಕ್ಕಮಗಳೂರು ಜಿಲ್ಲೆಯ ಮೂಡಿಗೆರೆ ತಾಲ್ಲೂಕಿನ ದುರ್ಗದಹಳ್ಳಿ ಗ್ರಾಮದ ಸಮೀಪದಲ್ಲಿರುವ ಒಂದು ಸುಂದರ ಜಲಪಾತವಾಗಿದೆ. ದುರ್ಗದಹಳ್ಳಿ ಜಲಪಾತ ಎಂದೂ ಕರೆಯಲ್ಪಡುವ ಕೊಡಿಗೆ ಜಲಪಾತವು ನೇತ್ರಾವತಿ ನದಿಯಿಂದ ರೂಪುಗೊಂಡಿದ್ದು, ಸುಮಾರು 30 ಅಡಿ ಎತ್ತರದಿಂದ ಧುಮ್ಮಿಕ್ಕಿ ಹರಿಯುತ್ತದೆ. ಸುತ್ತಲಿನ ದಟ್ಟ ಹಸಿರು ಹಾಗೂ ನೈಸರ್ಗಿಕ ಸೌಂದರ್ಯದ ನಡುವೆ ಇರುವ ಈ ಜಲಪಾತವು ಮನಮೋಹಕ ಪ್ರವಾಸಿ ತಾಣವಾಗಿದೆ.
ಕೊಡಿಗೆ ಜಲಪಾತದ ದೂರಗಳು
- ಬೆಂಗಳೂರು – 279 ಕಿ.ಮೀ
- ಚಿಕ್ಕಮಗಳೂರು – 68 ಕಿ.ಮೀ
- ಮೂಡಿಗೆರೆ– 38 ಕಿ.ಮೀ
- ಸಕಲೇಶಪುರ ರೈಲ್ವೆ ನಿಲ್ದಾಣ – 71 ಕಿ.ಮೀ
ನೇತ್ರಾವತಿ ನದಿಯ ಇತಿಹಾಸ
ಪುರಾಣದ ಕಥೆಯ ಪ್ರಕಾರ, ಹಿಂದೆ ಹಿರಣ್ಯಾಕ್ಷನೆಂಬ ದಾನವನನ್ನು ವರಾಹ ಸ್ವಾಮಿಯು ಸಂಹರಿಸಿ, ಭೂಮಿಯನ್ನು ಉದ್ಧರಿಸಿದ ಬಳಿಕ, ಚಿಕ್ಕಮಗಳೂರು ಜಿಲ್ಲೆಯ ಶೃಂಗೇರಿಯಿಂದ ಸುಮಾರು 16 ಕಿ.ಮೀ. ದೂರದಲ್ಲಿರುವ ಪಶ್ಚಿಮ ಘಟ್ಟಗಳ ಒಂದು ಭಾಗವಾದ ಗಂಗಾಮೂಲದ ವರಾಹಪರ್ವತ ಎಂದು ಕರೆಯಲ್ಪಡುವ ವೇದಪಾದ ಪರ್ವತದಲ್ಲಿ ವಿಶ್ರಮಿಸಿದನೆಂದು ಹೇಳಲಾಗುತ್ತದೆ.
ಆ ಸಂದರ್ಭದಲ್ಲಿ ವರಾಹ ಸ್ವಾಮಿಯ ಮೂರ್ತಿಯ ಎಡಕೋರೆಯಿಂದ ಇಳಿದ ಹನಿಗಳು ತುಂಗಾ ನದಿಯಾಗಿ, ಭೂಮಿಯನ್ನು ಭದ್ರವಾಗಿ ಹಿಡಿದುಕೊಂಡಿದ್ದ ಬಲಕಡೆಯಿಂದ ಇಳಿದ ಹನಿಗಳು ಭದ್ರಾ ನದಿಯಾಗಿ ಹಾಗೂ ಕಣ್ಣಂಚಿನಿಂದ ಇಳಿದ ಹನಿಗಳು ನೇತ್ರಾವತಿ ನದಿಯಾಗಿ ಹರಿಯತೊಡಗಿದವು ಎಂಬುದು ಪುರಾಣದ ನಂಬಿಕೆಯಾಗಿದೆ.
ವರಾಹಪರ್ವತದ ಕಣ್ಣಿನಂತಿರುವ ಭಾಗದಿಂದ ಹರಿದುಬರುವ ನೇತ್ರಾವತಿ ನದಿಯ ನೀರು ನೇತ್ರರೋಗಗಳನ್ನು ನಿವಾರಿಸುತ್ತದೆ ಎಂಬ ನಂಬಿಕೆಯೂ ಇದೆ.
ಚಿಕ್ಕಮಗಳೂರು ಜಿಲ್ಲೆಯ ಪಶ್ಚಿಮ ಘಟ್ಟಗಳ ಭಾಗವಾದ ಬಲ್ಲಾಳರಾಯನ ದುರ್ಗದ ಸಮೀಪದಲ್ಲಿ ನೇತ್ರಾವತಿ ನದಿಯ ಉಗಮವಾಗುತ್ತದೆ ಎಂದು ಹೇಳಲಾಗುತ್ತದೆ. ಇದರ ಉಗಮ ಪ್ರದೇಶವು ಸಮುದ್ರ ಮಟ್ಟದಿಂದ ಸುಮಾರು 1,504 ಮೀಟರ್ ಎತ್ತರದಲ್ಲಿದೆ. ಪ್ರಾಚೀನ ಗ್ರೀಕ್ ಇತಿಹಾಸಕಾರರು ನೇತ್ರಾವತಿ ನದಿಯನ್ನು ‘ನೀತ್ರಿ’ ಎಂದು ಕರೆದಿದ್ದರು ಎಂಬ ಉಲ್ಲೇಖವೂ ಕಂಡುಬರುತ್ತದೆ.
