ಶ್ರೀ ಉಳವಿ ಚೆನ್ನಬಸವೇಶ್ವರ ದೇವಸ್ಥಾನವು ಕರ್ನಾಟಕ ರಾಜ್ಯದ ಉತ್ತರ ಕನ್ನಡ ಜಿಲ್ಲೆಯ ಜೋಯಿಡಾ ತಾಲ್ಲೂಕಿನ ಉಳವಿ ಗ್ರಾಮದಲ್ಲಿರುವ ಪ್ರಸಿದ್ಧ ತೀರ್ಥಕ್ಷೇತ್ರವಾಗಿದೆ. ಈ ದೇವಾಲಯವು ಲಿಂಗಾಯತ ಸಮುದಾಯದ ಪವಿತ್ರ ಕ್ಷೇತ್ರಗಳಲ್ಲಿ ಒಂದಾಗಿದ್ದು, ತನ್ನ ಆಧ್ಯಾತ್ಮಿಕ ಮಹತ್ವದಿಂದ ಲಕ್ಷಾಂತರ ಭಕ್ತರನ್ನು ಆಕರ್ಷಿಸುತ್ತದೆ. ಉತ್ತರ ಕರ್ನಾಟಕದ ಜನರಿಗೆ ಉಳವಿಯು ಅತ್ಯಂತ ಪವಿತ್ರ ಕ್ಷೇತ್ರವೆಂದು ಪರಿಗಣಿಸಲಾಗಿದೆ.
ಶ್ರೀ ಉಳವಿ ಚೆನ್ನಬಸವೇಶ್ವರ ದೇವಸ್ಥಾನದ ದೂರಗಳು
- ಬೆಂಗಳೂರು – 502 ಕಿ.ಮೀ
- ಕಾರವಾರ – 71 ಕಿ.ಮೀ
- ಜೋಯಿಡಾ – 37 ಕಿ.ಮೀ
- ದಾಂಡೇಲಿ – 46 ಕಿ.ಮೀ
ಇತಿಹಾಸ
ಕಲ್ಯಾಣ ಕ್ರಾಂತಿಯ ಸಮಯದಲ್ಲಿ ಬಿಜ್ಜಳನ ಸೈನ್ಯವು ಶರಣರ ಗುಂಪನ್ನು ಬೆನ್ನಟ್ಟಿತು. ಬಿಜ್ಜಳನ ಸಾವಿಗೆ ಶರಣರೇ ಕಾರಣರೆಂಬ ಭಾವದಿಂದ, ಶರಣರ ಮೇಲೆ ದಾಳಿ ಮಾಡಲು ಸೈನ್ಯ ಸಜ್ಜಾಗಿತ್ತು. ಆಗ ಶರಣರು ಗುಂಪು ಗುಂಪಾಗಿ ಉಳವಿ, ಶ್ರೀಶೈಲ ಹಾಗೂ ಕೂಡಲಸಂಗಮದ ಕಡೆಗೆ ಪ್ರಯಾಣ ಬೆಳೆಸಿದರು.
ಉಳವಿಯ ಕಡೆಗೆ ಬಂದ ಶರಣರ ನಾಯಕನೇ ಚೆನ್ನಬಸವಣ್ಣ. ಇವರು ಬಸವಣ್ಣನವರ ಸೋದರ ಅಳಿಯರಾಗಿದ್ದು, ಅಕ್ಕ ನಾಗಲಾಂಬಿಕೆಯವರ ಪುತ್ರರಾಗಿದ್ದರು. ಅಸಂಖ್ಯಾತ ಶರಣರ ಸಾನ್ನಿಧ್ಯದಲ್ಲಿ ಬೆಳೆದ ಇವರು ಮಹಾನ್ ಜ್ಞಾನಿಯಾಗಿದ್ದರು. ತಮ್ಮ ಪ್ರತಿಭೆ ಮತ್ತು ಅಪಾರ ಪಾಂಡಿತ್ಯದಿಂದ ಹೆಚ್ಚಿನ ಮಾನ್ಯತೆ ಪಡೆದಿದ್ದರು.
ಅಲ್ಲಿನ ಶರಣ ಸಂವಹನದಲ್ಲಿ ಅತಿ ಕಿರಿಯವರಾಗಿದ್ದರೂ, ಕೇವಲ 12ನೇ ವಯಸ್ಸಿನಲ್ಲೇ ಶೂನ್ಯ ಸಿಂಹಾಸನದ ಉತ್ತರಾಧಿಕಾರಿಯಾಗುವ ಹಿರಿಮೆಯನ್ನು ಪಡೆದರು. “ಕೂಡಲಸಂಗಮದೇವ” ಎಂಬುದು ಇವರ ವಚನಗಳ ಅಂಕಿತವಾಗಿತ್ತು. ಇವರು ಸುಮಾರು 1,500ಕ್ಕೂ ಹೆಚ್ಚು ವಚನಗಳನ್ನು ರಚಿಸಿದ್ದಾರೆ.
ಚೆನ್ನಬಸವಣ್ಣನವರು ಹೆಚ್ಚು ಕಾಲ ಬದುಕಲಿಲ್ಲ. ಅವರು ಉಳವಿಯಲ್ಲಿ ಲಿಂಗೈಕ್ಯರಾದರು. ಅವರ ಸಮಾಧಿಯೇ ಇಂದಿನ ಶ್ರೀ ಉಳವಿ ಚನ್ನಬಸವೇಶ್ವರ ದೇವಾಲಯವಾಗಿದೆ.
ಪ್ರತಿವರ್ಷ ನಡೆಯುವ ರಥೋತ್ಸವ ಮತ್ತು ಜಾತ್ರೆಯು ಈ ಕ್ಷೇತ್ರದ ಪ್ರಮುಖ ಆಕರ್ಷಣೆಯಾಗಿದ್ದು, ಸಾವಿರಾರು ಭಕ್ತರನ್ನು ಈ ಸ್ಥಳಕ್ಕೆ ಆಕರ್ಷಿಸುತ್ತದೆ. ದೇವಾಲಯದ ಸುತ್ತಮುತ್ತಲಿರುವ ಅಕ್ಕನಾಗಮ್ಮನ ಗುಹೆ, ಹರಳಯ್ಯನ ಚಿಲುಮೆ ಮುಂತಾದ ಪವಿತ್ರ ಸ್ಥಳಗಳು ದರ್ಶನಾರ್ಥಿಗಳಿಗೆ ಇನ್ನಷ್ಟು ಆಕರ್ಷಣೆಯ ಕೇಂದ್ರಗಳಾಗಿವೆ.
