ಸುಪಾ ಅಣೆಕಟ್ಟು ಕರ್ನಾಟಕ ರಾಜ್ಯದ ಉತ್ತರ ಕನ್ನಡ ಜಿಲ್ಲೆಯ ಜೋಯಿಡಾ ತಾಲ್ಲೂಕಿನ ಅವೇಡಾ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಗಣೇಶಗುಡಿ ಗ್ರಾಮದ ಹತ್ತಿರ ಇರುವ ಅಣೆಕಟ್ಟಾಗಿದೆ. ಕಾಳಿ ನದಿಗೆ ಅಡ್ಡಲಾಗಿ ಈ ಸುಪಾ ಅಣೆಕಟ್ಟನ್ನು ನಿರ್ಮಿಸಲಾಗಿದೆ. ಇದು ಕರ್ನಾಟಕದ ಅತಿ ಎತ್ತರದ ಅಣೆಕಟ್ಟಾಗಿದೆ.
ಸುಪಾ ಅಣೆಕಟ್ಟಿನ ದೂರಗಳು
- ಬೆಂಗಳೂರು – 470 ಕಿ.ಮೀ
- ಕಾರವಾರ – 108 ಕಿ.ಮೀ
- ಜೋಯಿಡಾ – 25 ಕಿ.ಮೀ
- ದಾಂಡೇಲಿ – 20 ಕಿ.ಮೀ
101 ಮೀಟರ್ ಎತ್ತರ ಮತ್ತು 332 ಮೀಟರ್ ಉದ್ದ ಹೊಂದಿರುವ ಈ ಅಣೆಕಟ್ಟು 15 × 10 ಮೀಟರ್ ಗಾತ್ರದ ಮೂರು ಗೇಟ್ಗಳನ್ನು ಹೊಂದಿದೆ. ಅಣೆಕಟ್ಟಿನ ಒಟ್ಟು ಸಂಗ್ರಹ ಸಾಮರ್ಥ್ಯವು 4.178 ಘನ ಕಿಲೋಮೀಟರ್ ಅಥವಾ 147 ಟಿಎಂಸಿ ಅಡಿಗಳಷ್ಟಿದೆ.
ಈ ಅಣೆಕಟ್ಟು 1180 ಮೆಗಾವ್ಯಾಟ್ ಒಟ್ಟು ಸ್ಥಾಪಿತ ಸಾಮರ್ಥ್ಯ ಹೊಂದಿರುವ ಕಾಳಿನದಿ ಜಲವಿದ್ಯುತ್ ಯೋಜನೆಯ ಎಲ್ಲಾ ವಿದ್ಯುತ್ ಕೇಂದ್ರಗಳಿಗೆ ಮುಖ್ಯ ಜಲಾಶಯವಾಗಿ ಕಾರ್ಯನಿರ್ವಹಿಸುತ್ತದೆ. ಇದರಲ್ಲಿ ಪ್ರಮುಖವಾದ 810 ಮೆಗಾವ್ಯಾಟ್ ಸಾಮರ್ಥ್ಯದ ನಾಗಝರಿ ವಿದ್ಯುತ್ ಕೇಂದ್ರವೂ ಸೇರಿದೆ.
ಅಣೆಕಟ್ಟಿನ ಬುಡದಲ್ಲಿರುವ ವಿದ್ಯುತ್ ಕೇಂದ್ರವು ತಲಾ 50 ಮೆಗಾವ್ಯಾಟ್ ಸಾಮರ್ಥ್ಯದ ಎರಡು ವಿದ್ಯುತ್ ಜನರೇಟರ್ಗಳನ್ನು ಹೊಂದಿದೆ. ಇಲ್ಲಿ ಉತ್ಪಾದನೆಯಾಗುವ ವಿದ್ಯುತ್ ಅನ್ನು ಕರ್ನಾಟಕದ ವಿವಿಧ ಭಾಗಗಳಿಗೆ ಸರಬರಾಜು ಮಾಡಲಾಗುತ್ತದೆ.
ಈ ಅಣೆಕಟ್ಟನ್ನು ಹಿಂದೂಸ್ತಾನ್ ಸ್ಟೀಲ್ ವರ್ಕ್ಸ್ ಕನ್ಸ್ಟ್ರಕ್ಷನ್ ಲಿಮಿಟೆಡ್ ನಿರ್ಮಿಸಿದ್ದು, ಇದನ್ನು ಕರ್ನಾಟಕ ಪವರ್ ಕಾರ್ಪೊರೇಷನ್ ಲಿಮಿಟೆಡ್ ವಿನ್ಯಾಸಗೊಳಿಸಿ, ಒಡೆತನ ಹೊಂದಿ ನಿರ್ವಹಿಸುತ್ತಿದೆ. ಈ ವಿದ್ಯುತ್ ಕೇಂದ್ರವನ್ನು 1985ರಲ್ಲಿ ಕಾರ್ಯಾರಂಭ ಮಾಡಲಾಯಿತು. ಈ ಅಣೆಕಟ್ಟನ್ನು ಮುಖ್ಯವಾಗಿ ಜಲವಿದ್ಯುತ್ ಉತ್ಪಾದನೆಗಾಗಿ ಬಳಸಲಾಗುತ್ತದೆ.
