ಶಿಶುನಾಳ ಶರೀಫ್ ಸಾಹೇಬ್ ಸ್ಮಾರಕ

ಶಿಶುನಾಳ ಶರೀಫ್ ಸಾಹೇಬ್ ಸ್ಮಾರಕವು ಕರ್ನಾಟಕ ರಾಜ್ಯದ ಹಾವೇರಿ ಜಿಲ್ಲೆಯ ಶಿಗ್ಗಾಂವಿ ತಾಲೂಕಿನ ಶಿಶುನಾಳ ಗ್ರಾಮದಲ್ಲಿದೆ. ಶಿಶುನಾಳ ಶರೀಫರು ಕನ್ನಡ ಸಾಹಿತ್ಯದ ತತ್ವಪದಗಳ ರೂವಾರಿಯಾಗಿದ್ದು, ಅನುಭಾವ ಕಾವ್ಯದ ಹೊಂಗಿರಣವನ್ನು ಹರಿಸಿದ ಪ್ರಸಿದ್ಧ ವರಕವಿಗಳಾಗಿದ್ದಾರೆ. ಅವರು ದೈವಭಕ್ತ, ಸಂತ, ಜ್ಞಾನಿ, ಕವಿ ಮತ್ತು ಸಮಾಜ ಸುಧಾರಕರಾಗಿದ್ದರು. ಮಾತೃಹೃದಯ, ಕರುಣೆ, ಮೈತ್ರಿ ಮತ್ತು ಪ್ರೇಮಸ್ವಭಾವವನ್ನು ಹೊಂದಿದ ಮಹಾನ್ ವ್ಯಕ್ತಿತ್ವವಾಗಿ ಶರೀಫರು ಪ್ರಸಿದ್ಧರಾಗಿದ್ದಾರೆ.

ಶಿಶುನಾಳ ಶರೀಫ್ ಸಾಹೇಬ್ ಸ್ಮಾರಕದ ದೂರಗಳು

ಬೆಂಗಳೂರು – 384 ಕಿ.ಮೀ
ಹಾವೇರಿ – 52 ಕಿ.ಮೀ
ಶಿಗ್ಗಾಂವ್ – 20 ಕಿ.ಮೀ
ಗುಡಗೇರಿ ರೈಲ್ವೆ ನಿಲ್ದಾಣ – 6 ಕಿ.ಮೀ
ಹಾವೇರಿ ರೈಲ್ವೆ ನಿಲ್ದಾಣ – 55 ಕಿ.ಮೀ

ಶಿಶುನಾಳ ಶರೀಫ್ ಸಾಹೇಬ್ ಸ್ಮಾರಕ ಅವರ ಬಗ್ಗೆ ಮಾಹಿತಿ

ಶಿಶುನಾಳ ಶರೀಫರು 1819ರ ಮಾರ್ಚ್ 7ರಂದು ಹಾವೇರಿ ಜಿಲ್ಲೆಯ ಶಿಗ್ಗಾಂವಿ ತಾಲೂಕಿನ ಶಿಶುನಾಳ ಗ್ರಾಮದಲ್ಲಿ ಜನಿಸಿದರು. ಇವರ ತಂದೆ ದೇವಕಾರ ಮನೆತನದ ಇಮಾಮ ಹಜರತ್ ಸಾಹೇಬರು ಹಾಗೂ ತಾಯಿ ಹಜ್ಜೂಮಾ. ಇವರ ಪೂರ್ಣ ಹೆಸರು ಮಹಮ್ಮದ ಶರೀಫ. ಪ್ರಾಥಮಿಕ ವಿದ್ಯಾಭ್ಯಾಸವನ್ನು ಶಿಶುನಾಳದಲ್ಲಿಯೇ ಪಡೆದ ಅವರು, ಮುಲ್ಕಿ ಪರೀಕ್ಷೆಯಲ್ಲಿ ಉತ್ತೀರ್ಣರಾದ ನಂತರ ಕೆಲವು ಕಾಲ ಪ್ರಾಥಮಿಕ ಶಾಲೆಯಲ್ಲಿ ಶಿಕ್ಷಕರಾಗಿ ಸೇವೆ ಸಲ್ಲಿಸಿದರು.

ಈ ಅವಧಿಯಲ್ಲಿ ಶರೀಫರಿಗೆ ಕಳಸದ ಗುರು ಗೋವಿಂದಭಟ್ಟರಿಂದ ಅನುಗ್ರಹ ದೊರೆಯಿತು. ಮಗನು ಉದ್ಯೋಗವನ್ನು ತೊರೆದು ಆಧ್ಯಾತ್ಮಿಕ ಚಿಂತನೆಗೆ ತೊಡಗಿಕೊಂಡುದರಿಂದ, ತಂದೆತಾಯಿಗಳು ಕುಂದಗೋಳದ ನಾಯಕ ಮನೆತನದ ಫಾತಿಮಾ ಅವರೊಂದಿಗೆ ಇವರ ವಿವಾಹವನ್ನು ನೆರವೇರಿಸಿದರು. ನಂತರ ಇವರಿಗೆ ಒಬ್ಬ ಹೆಣ್ಣು ಮಗು ಜನಿಸಿತು; ಆದರೆ ಆ ಮಗು ಹೆಚ್ಚು ದಿನ ಬದುಕಲಿಲ್ಲ. ಮಗುವಿನ ದುಃಖದಿಂದ ಫಾತಿಮಾ ಅವರು ಕೂಡ ಅನಾರೋಗ್ಯಕ್ಕೆ ಒಳಗಾಗಿ ನಿಧನರಾದರು.

ಜೀವನದಲ್ಲಿ ಸಂಭವಿಸಿದ ಈ ದುಃಖಕರ ಘಟನೆಗಳ ನಂತರ, ಶರೀಫರು ಸಂಪೂರ್ಣವಾಗಿ ಆಧ್ಯಾತ್ಮಿಕ ಸಾಧನೆಗೆ ತೊಡಗಿದರು. ಸಜ್ಜನರು ಮತ್ತು ವಿದ್ಯಾವಂತರ ಸಹವಾಸದಲ್ಲಿ ಕಾಲ ಕಳೆಯುತ್ತಾ, ತಮಗೆ ಸೂಕ್ತ ಮಾರ್ಗದರ್ಶನ ನೀಡುವ ಗುರುವನ್ನು ಹುಡುಕಿದರು. ಅಂತಿಮವಾಗಿ ಗೋವಿಂದಭಟ್ಟರನ್ನು ತಮ್ಮ ಗುರುವಾಗಿ ಸ್ವೀಕರಿಸಿ, ಅವರಿಂದ ಉಪನಿಷತ್ತುಗಳ ಸಾರವನ್ನು ತಿಳಿದುಕೊಂಡರು.

ಶರೀಫರು ಯಾವುದೇ ಮತದ ಮೂಢನಂಬಿಕೆಗಳಿಗೆ ಒಳಗಾಗದ ವಿಶಾಲ ಮನಸ್ಸಿನವರಾಗಿದ್ದರು. ಗುರು-ಶಿಷ್ಯರು ಸೇರಿ ಮಸೀದಿ ಮತ್ತು ದೇವಾಲಯಗಳಿಗೆ ಭೇಟಿ ನೀಡಿ ಸರ್ವಧರ್ಮ ಸಮನ್ವಯದ ಸಂದೇಶವನ್ನು ಸಾರಿದರು. ನವಲಗುಂದದ ನಾಗಲಿಂಗಮಠ, ಗರಗದ ಮಡಿವಾಳಪ್ಪ ಹಾಗೂ ಹುಬ್ಬಳ್ಳಿಯ ಸಿದ್ಧಾರೂಢ ಸ್ವಾಮಿಗಳಂತಹ ಮಹನೀಯರ ಪ್ರಭಾವವೂ ಇವರ ಮೇಲೆ ಹೆಚ್ಚಾಗಿತ್ತು.

ಶರೀಫರು ರಚಿಸಿದ ತತ್ವಪದಗಳು ಧಾರವಾಡ ಭಾಗದ ಆಡುಭಾಷೆಯ ಸೊಗಡನ್ನು ಹೊಂದಿವೆ. ಅವರ ಪದಗಳಲ್ಲಿ ದೇವತಾಸ್ತುತಿ, ತತ್ವಬೋಧನೆ ಹಾಗೂ ಜೀವನ ಮೌಲ್ಯಗಳ ಅಭಿವ್ಯಕ್ತಿ ಕಾಣಬಹುದು. ಬಹುತೇಕ ಪದಗಳು ಕನ್ನಡದಲ್ಲಿದ್ದರೂ, ಕೆಲವು ಉರ್ದು ಭಾಷೆಯಲ್ಲಿಯೂ ಇವೆ.

ಗ್ರಾಮೀಣ ಜೀವನದ ಸನ್ನಿವೇಶಗಳು, ವಸ್ತುಗಳು, ವ್ಯಕ್ತಿಗಳು ಮತ್ತು ಪಶು-ಪಕ್ಷಿಗಳ ರೂಪಕಗಳ ಮೂಲಕ ಅವರು ತಮ್ಮ ಅನುಭಾವವನ್ನು ಸುಂದರವಾಗಿ ವ್ಯಕ್ತಪಡಿಸಿದ್ದಾರೆ. “ಹಾಡು ಬೋಧ ಒಂದೇ, ಬ್ರಹ್ಮನಾದ ಒಂದೇ” ಎಂಬುದು ಅವರ ಜೀವನದ ಮೂಲ ಸಂದೇಶವಾಗಿತ್ತು.

ಶರೀಫರು ಸನಾತನ ವೈದಿಕ ತತ್ತ್ವ, ವೀರಶೈವ ಲಿಂಗತತ್ತ್ವ ಹಾಗೂ ಸೂಫಿ ಪರಂಪರೆಯ ತತ್ತ್ವಗಳನ್ನು ಸಮನ್ವಯಗೊಳಿಸಿ ತಮ್ಮದೇ ಆದ ವಿಶಿಷ್ಟ ಆಧ್ಯಾತ್ಮಿಕ ಮಾರ್ಗವನ್ನು ರೂಪಿಸಿದರು. ಅವರು ಸರ್ವಧರ್ಮ ಸಮನ್ವಯದ ಪ್ರತಿರೂಪವಾಗಿದ್ದು, ಹಿಂದು-ಮುಸ್ಲಿಂ ಏಕತೆಯ ಸಂಕೇತವಾಗಿ ಮಹಾತ್ಮ ಕಬೀರರಂತೆ ಉತ್ತರ ಕರ್ನಾಟಕದಲ್ಲಿ ಪ್ರಸಿದ್ಧರಾದರು.

ಜನಪದ ಭಾಷೆಯ ಸೊಗಡು, ಗ್ರಾಮೀಣ ಸಂಗೀತದ ಲಯ ಮತ್ತು ಲಾಸ್ಯದ ಮೂಲಕ ಅವರು ಜನಮನಗಳನ್ನು ಗೆದ್ದರು. ತಮ್ಮ ಮನೆಯಲ್ಲಿ ಬೋಧನೆ ನೀಡುತ್ತಿದ್ದ ಸ್ಥಳವು ಇಂದಿಗೂ “ಬೋಧಪೀಠ” ಎಂಬ ಹೆಸರಿನಲ್ಲಿ ಪೂಜಿಸಲ್ಪಡುತ್ತಿದೆ.

ಶರೀಫರು ಕನ್ನಡ ಮಾತ್ರವಲ್ಲದೆ ಉರ್ದು ಮತ್ತು ಮರಾಠಿ ಭಾಷೆಗಳಲ್ಲಿಯೂ ಪಾಂಡಿತ್ಯ ಹೊಂದಿದ್ದರು. ಅವರ ತತ್ವಪದಗಳು ಯಾವುದೇ ಒಂದು ಸ್ಥಾಪಿತ ಮತಕ್ಕೆ ಸೀಮಿತವಾಗಿರದೆ, ರಾಮಾಯಣ, ಮಹಾಭಾರತ, ವಚನ ಸಾಹಿತ್ಯ, ಕೀರ್ತನೆಗಳು, ಪ್ರಭುಲಿಂಗಲೀಲೆ ಹಾಗೂ ಸೂಫಿ ತತ್ತ್ವಗಳಿಂದ ಪ್ರೇರಿತವಾಗಿವೆ.

1888ರ ಆಗಸ್ಟ್‌ನಲ್ಲಿ ಶಿಶುನಾಳದಲ್ಲಿದ್ದ ತಮ್ಮ 2.20 ಎಕರೆ ಭೂಮಿ ಮತ್ತು ಮನೆಯನ್ನು ಮಾರಾಟ ಮಾಡಿ ಅವರು ಋಣಮುಕ್ತರಾದರು. ಶರೀಫರು ತತ್ವಪದಗಳು, ಲಾವಣಿಗಳು, ಹೋಳಿ ಹಾಡುಗಳು ಮತ್ತು ಮಂಗಳಾರತಿ ಪದಗಳನ್ನು ರಚಿಸಿ ಜನರಿಗೆ ಧರ್ಮನೀತಿ ಹಾಗೂ ಜೀವನ ಮೌಲ್ಯಗಳನ್ನು ಬೋಧಿಸಿದರು.

ಅವರು “ಎಚ್ಚರವಿರಲಿ ತಮ್ಮಾ” ಎಂದು ಹೇಳಿ ಜಾತಿ, ಹಣ ಮತ್ತು ಅಧಿಕಾರದ ಬಗ್ಗೆ ಜಾಗೃತಿ ಮೂಡಿಸಿದರು. “ದೇಹವೇ ಮಸೀದಿ, ದೇಗುಲ” ಎಂಬ ಸಂದೇಶದ ಮೂಲಕ ಮಾನವೀಯತೆಯನ್ನು ಸಾರಿದರು.

1889ರ ಜುಲೈ 3ರಂದು ಸುಮಾರು 70 ವರ್ಷಗಳ ಜೀವನವನ್ನು ಪೂರೈಸಿದ ಶರೀಫರು “ಬಿಡತೇನಿ ದೇಹ” ಎಂದು ಹಾಡುತ್ತ ವಿದೇಹ ಕೈವಲ್ಯವನ್ನು ಹೊಂದಿದರು. ಅವರ ಅಂತ್ಯಕ್ರಿಯೆಗಳು ಹಿಂದು ಹಾಗೂ ಮುಸ್ಲಿಂ ಭಕ್ತರ ಸಮ್ಮುಖದಲ್ಲಿ ನೆರವೇರಿದವು.

ಶರೀಫರು ರಚಿಸಿದ ಕಾವ್ಯಗಳಲ್ಲಿ ಕೆಲವು: